На 93 години денеска почина легендарниот италијански моден дизајнер Валентино Гаравани. Тој беше еден највлијателните креатори на висока мода во втората половина на 20-тиот век и почетокот на 21-виот век. Валентино е основач на модната куќа Valentino и автор на препознатлив стил кој со децении симболизира елеганција, луксуз и безвременска убавина.
Роден во Италија, Валентино ја започна својата кариера по завршувањето на образованието во Франција, каде што ги совлада основите на висока мода. Во почетокот на 1960-тите отвори свое модно ателје, а брзо стекна меѓународна репутација. Неговите колекции ги носеа бројни филмски ѕвезди, членови на кралски дворови и политичка елита, со што брендот Valentino стана симбол на престиж на глобално ниво.
Особено беше познат по користењето на интензивната црвена боја, позната како „Valentino црвена“, која стана заштитен знак на неговиот естетски израз. За време на неговата долга кариера, Валентино освои бројни признанија и награди за својот придонес во модата и дизајнот, оставајќи траен белег врз современата модна индустрија.
Валентино беше еден од модните гиганти на 20 век, а неговите креации ги носеа Елизабет Тејлор, Ненси Реган, Шерон Стоун, Џулија Робертс и Гвинет Палтроу. Во 1960 година, тој беше коосновач на модната куќа Валентино и е рангиран на врвот на таа професија заедно со Џорџо Армани и Карл Лагерфелд.
Иако се повлече од активното дизајнерско работење во 2000-тите години, Валентино остана присутен како симбол на брендот и влијателна личност во светот на луксузот. Модната куќа Valentino продолжи со работа под ново креативно водство, но го задржа препознатливиот стил и елементи што ги воспостави основачот.
Ковчегот со неговото тело ќе биде изложен во седиштето на неговата фондација во Рим в среда и четврток, а погребот ќе биде извршен в петок во Рим.
